اشهر ادواره عفركوش وحنظلة حين قال شلت يدى

فاكرين جملة “شُلت يدي”، وبعدها جملة “إنها سليمة”؟.. الجملة اللي اتقالت في فيلم “فجر الإسلام”

وبقت مع الوقت بتستخدم في كوميكسات؟

طيب فاكرين جملة “تطلب إيه يا مصطفى” اللي اتقالت في فيلم “الفانوس السحري” اللي قالها العفريت لـ “إسماعيل ياسين” وبرضه بقت من الجمل الخالدة في السينما!

لماذا حصره المخرجين بادوار الشر

الحقيقة إن الدورين دول وغيرهم كتير كانوا ببصمة الفنان الراحل “محمود فرج” الشهير بـ “مجانص”.. واحد من الوشوش الفنية المعروفة للناس بالذات عضلاته القوية، وبنيانه الضخم، واللي بسببهم حصره المخرجين في أدوار معينه بيغلب عليها الطابع الشرير لكنه نجح في اقتحام قلوب المشاهدين بخفة دمه، وتحويل أدواره الشريرة للفكاهة..

فرج من مواليد عام 1922 في أسرة متوسطة, حصل على بكالوريوس التربية الرياضية وكمان بكالوريوس التجارة ودرس برضه خدمة إجتماعية!!!

لما اتخرج من الجامعة اشتغل موظف في وزارة الكهرباء، وأحيل للمعاش على منصب وكيل لوزارة الكهرباء بالإسكندرية.. لكن ومع الوظيفة بسبب حبه لمجال الفن درس كمان الفنون المسرحية وقدم كتير من أعمال شكسبير على المسرح!.

كان بطل فى الملاكمة

“محمود” كمان كان بطل فى الملاكمة وده ساعده على دخول عالم السينما وتحديداً في أدوار الشخص الرياضي زى دوره في فيلم “أيامنا الحلوة”، “إسماعيل ياسين في البوليس الحربي” واللي عمل فيه دور “مجانص” ومن وقتها لزق فيه الإسم!..

عمل أكتر من 100 فيلم بس الدور الأبرز في مسيرته بحسب رأى النقاد والجمهور هو دور “عفركوش” في فيلم “الفانوس السحري” مع “إسماعيل ياسين”

رغم ملامحه وبنيانه وجسمه اللي ممكن يدوا إنطباع عن قسوته أو عنفه لكنه وبشهادة كل اللي تعاملوه معاه كان من أطيب وأجدع الناس اللي ممكن حد يتعامل معاهم!..

نهاية مأساوية

للأسف وفاة ونهاية “محمود” كانت مأساوية شوية.. أصيب بمرض السكر وفضل فترة طويلة بتعالج منه وبسببه فقد واحدة من رجليه وعينه اليمين!.. اتوفى بسبب حالة نفسية كان بيمر بيها لما لقى نفسه مش قادر يدفع فاتورة الميه الشهرية واللي جت له برقم كبير فصاحب البيت قطع عنه الميه!.. فضل يتألم نفسياً وجسدياً لحد ما اتوفى سنة 2009 وعمره 87 سنة لكن بعد ما ساب ابتسامة لطيفة على وش كل اللي اتفرج عليه في دور من أدواره.. ربنا يرحمه.

#الحكاية_نت